LEGAZPI CITY—Hinabon kan dae pa nabibistong mga indibidwal an kwarta asin nagkapirang alahas sa sarong tiendahan sa Barangay San Carlos, Tabaco City, pasado alas-10 nin aga kan Lunes, Marso 16.
Segun ki Mariella Brosas an may kagsadiri kan hinabonan na tiendahan, sa intrevista kan Bombo Radyo Legazpi, nangyari an insidente mantang nakatalikod an saiyang ina na nagbabantay kan tindahan kun sain kabale sa mga nakua an kwartang may kantidad nin haros P120,000 asin mga alahas siring kan apat na singsing asin sarong hikaw na nagkakantidad nin labi P50,000.
Basado sa CCTV footage, may sarong lalaki na nagbakal nin softdrink asin sigarilyo asin sige na suboot kaining hiling sa laog kan saindang tiendahan.
Segun saiya na nalingawan kan saiyang ina an ikandado an tiendahan asin kan makatiempo nin oras na wara nang tawo an mga suspek, digdi na ninda kinua sa paagi kan sarong pagsungkit an kwarta asin pirang alahas.
Nagsagibo na man an kapulisan nin pag-trace sa mga inagihan na lugar kan mga suspek, kabale an paghiling sa CCTV kan city local government unit para sa mas malinaw na footage nganing mahanap an plate number kan ginamit na motor alagad “For Registration” an nakabugtak sa plaka kaini.
Mientrastanto, may naresibe man sindang report gikan sa Sto. Domingo PNP na may isinurender saindang bag na nakua kan mga para-graba sa parte kan Sta. Misericordia, Sto. Domingo.
Tinapok suboot an nasabing bag kan mga naka-motor na pigtutubudang iyo an mga suspek sa insidente asin laog na sana kaini an mga IDs asin sinsilyo.
Ipigpaubaya na ngonian ninda sa kapulisan an imbestigasyon nganing maaraman an mga indibidwal na nasa likod kan panghahabon.
Pagiromdom man ni Brosas sa publiko na magin vigilant sa palibot asin sa mga tawong dae bisto; mensahe man niya sa mga suspek na maglaban nin patas huli sa pinagpagalan ninda an nasabing siring na kantidad.
