LEGAZPI CITY—Afuera sa mga basic necessities, kinakaipuhan ngunyan kan mga residentes na apektado kan pagputok kan Bulkang Mayon sa Barangay Buang, Tabaco City an kuryente sa palibot kan evacuation center nganing magin maliwanag an bisinidad magin an kaipuhan nindang pasilidad sa tubig.
Segun ki Brgy. Buang, Secretary Cristina Villaruben, sa intrevista kan Bombo Radyo Legazpi, kinakaipuhan man ninda nin tubig huli sa dakol na pamilya an presenteng nag-eebakwar sa saindang evacuation center.
Sa presente, igwang 76 pamilya o 256 indibidwal na an yaon saindang evacuation centers alagad may posibilidad pa ining madugangan huli sa may nagkapira pang residentes an dae pa nagbababa sa lugar huli sa saindang mga ataman na hayop asin mga pananom.
Pighayag man kan opisyal na kun anp man an pangangaipuhan kan saindang nasasakupan an tulos man na minasimbag an saindang lokal na gobierno.
Mientrastanto, mensahe man ni Villaruben sa mga residentes kan barangay na hagad ninda an saindang kooperasyon nganing magin maayos man an pamamalakad sa evacuation center, asin en kaso man na may mga concern an yaon man an opisyales kan barangay nganing matawan ini nin magkakanigong solusyon.
