LEGAZPI CITY-Padagos na nagpapahiling nin senyales nin pagrahay si Queen of All Media Si Kris Aquino sa saiyang helang na autoimmune, segun saiyang amigo na si Dindo Balares.
Sa sarong post sa social media, pigheras ni Balares an mga litrato kan aktres na dawa ngani nadidipisilan siya sa mga simpleng trabaho arog kan pagtindog, naghihinguha pa man giraray na maging independent.
Ipinahayag man niya na si Kris naghihingoa maggibo nin mga bagay na solo sana.
Pig-omaw man ni Balares an desisyon ni Kris na mag-tenirsa sarong pribadong beach resort, na suboot nakakatabang sa saiya na luway-luway na makarecover.
Nagpahiling man nin pagbabago an timbang ni Kris, poon 82 pounds kan Enero ngonian na taon pasiring sa 112 pounds, sarong indikasyon na nagrarahay na an saiyang kondisyon.
Pinasalamatan ni Balares an mga padagos na nangangadyi para sa salud ni Kris, asin piglinaw na bakong totoo an naglilibot na impormasyon na igwa siyang cancer.
Ipinahayag man ni Loi Villarama na dakula an naitabang sa pagtaas kan saiyang timbang an masustansyang pagkakan ni Kris, kabali an prutas asin iba pa.
