Kinumpirmar kan Office of the Ombudsman na naresibe na ninda an mga isinumiter na ‘joint affidavits’ kan mga dating soldados asin staff ni former Ako Bicol Party-list Rep. Zaldy Co.
Sa opisyal na pahayag na pinaluwas kan tanod-bayan hale ki Assistant Ombudsman Mico Clavano, ipighayag kaini na binisto kan tanod-bayan an ‘transmittal’ sa nasabing dokumento.
Segun sa opisina, rerepasohon nindang maray an joint affidavit na naresibe hale sa 18 self-identified former soldiers na isinumitir kasuodma.
Sa ibong kaini, nanindugan an Ombudsman na bako sana an laog kan saindang mga pahayag an sisiyasaton kaini kundi maging an kredibilidad kan mga ‘affiants’ o partikularmente an suboot dating staff kan nasambitan nang kongresista.
Pati suboot an mga ebidensyang iprinesentar sa mga pahayag an maingat na isasairarom sa ‘assessment’ o pag-analisar.
Sa ibong kaini, inasegurar kan Office of the Ombudsman sa publiko na an saindang pagtrato asin gigibuhon na aksyon sa mga mareresibeng affidavits an magigin patas, obhetibo, asin propesyonal.
Kasuudma, makalihis an paghampang asin pagpresentar kan mga dating soldados asin staff ni former Cong. Zaldy Co, pormal nindang isinumiter an saindang mga pahayag sa Ombudsman.
Ini mismo an sinabi kan saindang nangengenot na abogado na si Atty. Levito Baligod, na orog pang piglinaw na an naunambitan na dokumento an notaryado asin pinirmahan kan mga nabanggit na partido.
Kompwesto suboot an testimonya kan 2 dating miyembro kan Philippine Army asin 16 na dating miyembro kan Philippine Marines.
Dugang pa kaini na base sa sinumpaan na pahayag kan mga dating soldados, dakula suboot an pigdeliver kan mga ini hale ki Zaldy Co.
Ini suboot an mga pigtatao kan dating mambabatas sa mga opisyal kan gobyerno na nginaranan sa joint affidavit.
