LEGAZPI CITY — Padagos na pig-iimbestigaran ngonian kan mga otoridad an rason kan pagkahulog kan sarong kotse sa dagat sa Legazpi City port.
Napag-araman na nagpa-park an driver kan kotse sa nasambitan na port kan dae kaini nareparong uminatras asin diretsong nahulog sa dagat.
Masuwerte man na igwang mga tawo sa lugar na tulos na nagresponde tangarig isalbar an driver na si Josefina Thomas na na-trap sa laog kan behikulo.
Sa intrevista kan Bombo Radyo Legazpi sa saro sa mga rescuers na si Bernard Lopez, makalihis na mahiling an insidente dae sinda nagduwa-duwa na maglusong sa tubig kaibanan an duwa pang pag-iriba.
Mantang naglulubog sa tubig an behikulo, pinukpok suboot ninda nin gapo an salming kan pintuan alagad dae ini naging madali huli ta matagas an nasambit na bagay.
Huli digdi segun ki Lopez, guminibo sinda nin ibang mga paagi tangarig piriton na buksan an behikulo asin maisalbar an biktima.
Dugang pa kaini na nahiling nindang nalalamos na si Thomas makalihis laugon nin tubig an kotse kaya dali-dali ninda ining iniluwas.
Mientras tanto, sa suway na intrevista sa aki kan driver na si Patrick piglinaw kaini na wara nin anuman na kamatean an saiyang ina asin magin sinda an nabigla man kan maaraman an pangyayari.
Sa presente, pig-aaram pa an magigin resulta kan pag-oolay sa pagultangan ni Thomas asin kan tagsadiri kan behikulo na napag-araman na nadamay sa insidente.
Dae pa suboot masierto kun iko-cover kan insurance an nadanyaran na behikulo.
