Dae pinaboran kan korte sa Seoul an ika-duwang request na palawigon pa an detention ni impeached President Yoon Suk Yeol huli sa nagpalyar na deklarasyon nin ley martial.
Marurumduman na inarestar si Yoon kan nakalihis na semana huli sa kasong insurheksyon.
An saiyang martial law declaration kan nakalihis na Disyembre 3, 2024 an nagdurar sana nin anom na oras antes na na-lift huli sa pagkontra kan mga lehislador.
Segun sa Seoul Central District Court na difisil na makahanap nin bastanteng grounds ngani na mapagbigyan an kahagadan na pagpapalawig sa pagkakakulong ni Yoon.
Plano kan mga prosecutors na ikostodiya an na-impeach na presidente hasta sa Pebrero 6 antes an dagos na pag-indict saiya.
Sa presente padagos man na nagsasayuma si Yoon na makipag kooperar sa imbestigasyon huli ta segun sa legal defense team kaini, warang legal na otoridad an mga imbestigador.
