LEGAZPI CITY — Pigbabasol kan Department of Education (DepEd) Bicol an kakulangan nin supply nin building materials para sa pagkakaoctaba kan pagkumpleto sa konstruksyon kan temporary learning spaces (TLS) para sa mga estudyante na naapektaran huli sa piggamit bilang evacuation center an mga eskwelahan kasunod kan pag-aalburuto kan Bulkang Mayon.
Segun ki DepEd Bicol spokesperson Mayflor Jumamil, an solamenteng problema kan construction crew iyo an kakulangan nin supply kan coco lumber.
Pare-pareho suboot an problema sa manlain-laing lugar na nagkakawsa kan delay.
Kan nakalihis na Martes, inireport ni DepEd Bicol Regional Director Ramon Fiel Abcede ki Presidential Adviser for Political Affairs asin Mayon Crisis Manager Francis Tolentino na igwa nin 354 TLSs na kaipuhan bilang temporary learning spaces para sa displaced learners kan Mayon.
Nakumpleto na an 196 TLSs alagad kulang pa nin 158.
Nagpromesa man si Abcede ki Tolentino na sa pag-abot nin Lunes, Pebrero 12, makukumpleto na an konstruksyon kan TLS urog na bako man problema an pondo.
Alagad segun ki Jumamil, mauutob sana ini kun dae makakaulang sa pagkumpleto kan TLS an materyales, manpower asin kondisyon kan panahon.
