LEGAZPI CITY – Nadisganar an sarong kongresista sa mga nangyayari ngunyan na kariribukan sa gobyerno kan Pilipinas.
Sa intrevista kan Bombo Radyo Legazpi ki Ako Bicol Partylist Representative Rodel Batocabe, nagpahayag ini nin kamunduan huli ta wara pa suboot sarong taon makalihis an eleksyon, nag-iiriwal nanaman an mga opisyal kan gobyerno asin nagbabatuhan nin manlaen laen na mga akusasyon asin isyu.
Segun sa kongresista, nagdesisyon na an mga tawo kan eleksyon kun siisay an mawot nindang mamayo sa nasyon sa ibong kan pagluwas kan kanya- kanya kaluyahan asin kontrobersiya na pigkahampang kan mga ini.
Dae pa suboot nagpipila an lugad kan mga tawo kawsa kan nakalihis na pirilian asin ngunyan nagkakariribok nanaman huli sa impeachment complaint kontra sa duwa sa pinakahalangkaw na opisyal kan nasyon.
Pigduon man ni Batocabe na bako basta-basta an impeachment huli ta kinakaipuhan kaining mag-agi sa madugong proseso.
Pigbabasol man kaini sa nasambitan na reklamo an dae pagkakaigwa nin oras kan Kongreso sa pagpasar nin ley huli ta nakatutok na sana suboot ini sa isyu kan impeachment.
Mientrastanto, pigbuyagyag man kaini na siyertong dae matukaw an mga suportadores ninda Presidente Rodrigo Duterte asin VP Leni Robredo kaya kinakaipuahan na ipundo na suboot an pagbubusol kan reklamong ini.
