LEGAZPI CITY — Ipinasa kan sarong kongresista an House bill no. 5359 na nagmamawot na ma-postponed an nakatalaan na barangay elections.
Marurumduman na enot nang pighayag ni Presidente Rodrigo Duterte an saiyang kamawotan na maoctaba an nasambitan na eleksyon huli sa suboot na pagkakaimbwelto kan mga opisyal kan barangay sa manlaen laen na iligal na aktibidad.
Sa intrevista kan Bombo Radyo Legazpi ki Cong. Robert Ace Barbers, kinumpirma kaini na sa nasambitan na propuesto nakalaag an pag octaba sa barangay elections sa Oktubre 2017 hasta Oktubre 2020 asin magkakaigwa nin syncronized elections sa 2023 kun sain sabay na ikokundusir an SK elections asin barangay elections.
Dugang pa kaini na laog man sa nasambitan na bill an termination kan terms of offices kan gabos na incumbent barangay officials oras na maipasar na an ley asin si Presidente Duterte an matatawan nin poder na mag appoint nin mga opisyales sa barangay.
Pigklaro kaini na antes na maitao sa chief executive an poder na magpili nin opisyal, kinakaipuhan muna na magkaigwa nin sarong ley.
