LEGAZPI CITY—Hinamon ng isang kongresista si Department of Education Secretary Sonny Angara na magtulungan sa kung paano matutugunan ang tumataas na bilang ng teenage pregnancy sa bansa.
Ayon kay Albay 1st District Representative Congresswoman Krisel Lagman-Luistro, na baka pwedeng makita ang curriculum kung tunay na naipatutupad ang Republic Act No. 10354 o Reproductive Health Law kung saan isa sa mga may akda nito ay ang kanyang yumaong ama na si dating Albay Representative Edcel Lagman.
Aniya, katulong siya ng kalihim sa Kongreso upang mapaganda at mas maging responsive sa mga pangangailangan ng mga Pilipino.
Binigyang-diin pa ng kongresista na sila ay makikiisa at magiging katulong sila ng kalihim sa anumang hakbang pagdating sa edukasyon.
Samantala, ginawa ng kongresista ang pahayag matapos bumisita si DepEd Secretary Angara sa Tabaco City upang pangunahan ang inauguration at blessing ng kauna-unahang Alternative Learning System Community Learning Center sa rehiyon ng Bicol.
