LEGAZPI CITY-–Pighayag kan sarong weather specialist na an nanutarang kolor pulang kalangitan durante kan pangrarapado kan bagyong Opong an sarong precursory sign na igwang weather disturbance.
Segun ki Weather Specialist Jun Pantino, sa intrevista kan Bombo Radyo Legazpi, na maski nakaagi na an bagyo sa sarong lugar an may epekto ma giraray ini kun saen an outflow kan ikatulong layer kan atmospera an nagkakawsa nin kolar pulang kalangitan.
Segun saiya na pag natatamaan nin sunrise o sunset an mga maninipis na ice crystals sa third layer kan atmosphere an nagreresulta sa reflection o nagigin prism an ice crystals na nagkakawsa nin kolar pulang kalangitan.
Mientrastanto, padagos man na pigmo-monitor kan state weather bureau an mga nabibilog na cloud clusters sa Pacific Ocean huli sa posibilidad kaini na magin sarong bagyo.
Abiso man ni Pantino sa publiko na magin preparado huli sa mga piglalaoman pang mga bagyo sa mga masunod na bulan na kun saen posibleng magrani sa Eastern side kan Pilipinas siring kan Bicol region.
