LEGAZPI CITY- Dikit pa sanang kantidad nin kwarta asin dae pa nakakakabanga sa piglalaoman na koleksyon an Gobierno Provincial kan Albay katakod kan educational assistance program na Ahecs.
Sa intrevista kan Bombo Radyo Legazpi ki Cham Zuñiga kan Provincial Education Department, puon suboot kan koleksyon kan nakaaging taon nag-abot pa sana sa P3, 183, 385.85 an nakokolekta ninda sa mga estudyanteng nakapagtapos sa tabang kan nasabing programa kumpara sa target na P400 million.
Nabenipisyuhan kan Ahecs an nasa 17, 300 na estudyante na kinakaipuhan na magbayad, dawa pa an mga nag-dropout.
Sa ibong na lado, wara man na ipigtalaan na deadline an opisina sa pagkompleto sa koleksyon alagad hasta Oktubre na sana suboot ngonian na taon an pagbabayad na warang patong na 10% interest.
Ikinaogma man kaini an mga dating beneficiaries na dawa pa nasa ibang nacion na nakakapagpadara pa nin pambayad sa nakuang asistensiya mientras na padagos man an pagtrace kan mga personahes sa iba pang benepisyaryo sa tabang kan barangay officials.
Piga-email o pigdudumanan na sana man nin personal an iba.
Pangapodan pa kan opisyal na makisumaro an mga ini sa pagkompleto sa koleksyon tangarig na makatabang man sa iba pang mga proyekto na itatao para sa mga Albayano.
