LEGAZPI CITY-Tinatsaran kan grupong Kilusang Magbubukid ng Pilipinas (KMP) an sinabi ni President Ferdinand Marcos Jr. sa saiyang State of the Nation Address (SONA) kung sain pigbida kaini na napatunayan na an programang “Benteng Bigas Meron (BBM) Na,” na naipapabakal sa kantidad na P20 kada kilo sa mga kadiwa kan Pangulo outlets, na sinabing posibleng magin barato na an bagas asin dai nalulugi an mga paraooma.
Segun kay KMP chairperson Danilo Ramos, pigsasayumahan ninda an mga pigsasabi kan Presidente huli sa katunayan suboot warang otoridad an National Food Authority (NFA) na magbakal nin paroy sa mga paraooma huli sa Rice Tarrification Law asin nagiimport an ahensiya nin mga bagas.
Dagdag pa ni Ramos, kung may nababakal na diit na paroy an NFA hale sa mga paraooma, pigigibo sana ining buffer stocking para magamit o maayuda sa panahon kan kalamidad.
Afuera digdi, an pigpapabakal suboot na P20 pesos kada kilo nin bagas, bako bastante asin limitado sana an nakakaabot kaya dismayado an nasabing grupo sa SONA ni President Marcos.
Dagdag pa kan grupo na wara sindang nadangog na magayon na programa o solusyon sa angat kan mga nasa sektor ngani mapauswag an kabuhayan kan mga paraooma.
Mientrastanto, sinabi man kan Presidente na magtatalaga an gobierno nin nasa P133 bilyon pesos ngani pakusugon an mga programa kan Department of Agriculture asin sisiertuhon na maipapadagos an kampanya laban sa mga mapagsamantalang negosyante sa irarom kan Anti-Agricultural Economic Sabotage Act.
