LEGAZPI CITY—Suspendido an face-to-face classes sa gabos na mga pampubliko asin pribadong eskwelahan sa provincia kan Albay, saagang Biyernes, Enero 16 antes Sabado, Enero 17, huli sa posibleng epekto kan bagyong Ada.
Segun ki Schools Division Office Albay Spokesperson Froilan Tena, sa intrevista kan Bombo Radyo Legazpi, huli sa suspensyon an iimplementar an alternative delivery mode sa mga apektadong klase.
Nagpasalamat man an opisyal sa amay na pagdeklarar nin suspensyon nganing makapreparar sa nasabing aldaw asin makapagdistribuir nin modules na gagamiton sa paga-adal kan mga estudyante.
Mensahe ni Tena sa publiko na magsunod sa mga pigpapaluwas na deklarasyon nin pagsuspendir nin klase gikan sa saindang lokal na gobierno o magin sa gobierno provincial.
Mientrastanto, pighayag man kaini na nasa labi 800 na estudyante an apektado kan pag-alburoto kan bulkang Mayon partikularmente na gikan sa banwaan kan Camalig asin Malilipot kan nasambitang provincia.
