LEGAZPI CITY — Kinansela kan local government unit kan Daraga an nakatalaan kutang selebrasyon kan taunang Cagsawa Festival ngunyan na bulan kan Pebrero katakod man giraray kan nag-aalburutong bulkang Mayon sa Albay.
Sa intrevista kan Bombo Radyo Legazpi kay Daraga Tourism Officer Angela Pacres, pig-iisip sana suboot ninda an seguridad kan mga mapartisipar sa mga nakalinyadang aktibidad siring na sana kan extreme sports events na trail run o motorcycle race asin marathon sa pamitisan kan bulkan siring man an challenging na lava trail sa lumang Cagsawa village.
Dugang pa ni Pacres na simpleng pagpapalayog na sana nin lobo kasabay kan pagtatao nin pangadyi an isinagibo kan lokal na gobyerno ngani na tawan nin kolor an tema kan selebrasyon.
An Cagsawa Festival an sarong bulan na selebrasyon sa nasambitan na banwaan na nagsasalming sa historya kan lugar siring man sa gayon asin peligro na dara kan pigkokunsiderar na perfect-cone shape Mayon volcano.
Sa ibong kaini, sinierto kan opisyal na dae man giraray matatapos an kaugmagan huli ta dadarahon na sana an mga parlor games asin iba pang kompetisyon sa mga evacuation centers kan Daraga.
Naglalaom man ini na mas magigin makabuluhan an selebrasyon ngunyan na taon asin sa mga masunod pang taon urog pang mayaman sa kultura asin pagtatarabangan an mga tawo sa ibong kan agyat na pinag-aagihan.
