Nag-ofresir si North Korean leader Kim Jong Un nin bilog na suporta ki Russian President Vladimir Putin sa padagos na giyera sa Ukraine.
Ginibo kan lider an pahayag sa saiyang pag-oolay ki Russian Foreign Minister Sergei Lavrov, susog sa report kan state media kan Pyongyang.
An pagbisita ni Lavrov sa North Korea an parte kan serye nin mga pagbisita kan mga haralangkaw na opisyal gikan sa Moscow, bilang pagpapakusog kan relasyon kan duwang nacion sa tahaw kan padagos na opensiba laban sa Russia.
Ipighayag ni Kim na preparadong suportaran kan Pyongyang an gabos nin lakdang na isasagibo kan gobierno kan Russia mapadapit sa paglutas kan ugat kan krisis sa Ukraine, asin nagtutubod siyang sierto na matrayumpo an Russian army sa saindang obhetong protehiran an dignidad kan nacion.
Makalihis an pag-oolay, nagtaong onra si Lavrov kay Kim, asin binisto an mga bilateral na orolay, kaiba na an mga kasunduan gikan sa summit kan North Korea asin Russia kan Hunyo 2024.
Sa mga nakaaging semana, inanunsyar kan Russia na duwang beses na pagbisita sa Pyongyang bilang parte kan pagpapahewas kan koneksyon sa pagultangan kan duwang nacion.
Mientrastanto, diniskotir man ni Lavrov asin kan North Korean counterpart ni Kim, Choe Son Hui, an mga lakdang nganing mas lalo pang pahigoton an bilateral na relasyon na nagin sarong “invincible alliance”.
