Nag-uugong an mga balita mapadapit sa hiwalayan kan pop star na si Katy Perry asin aktor na si Orlando Bloom, makalihis an siyam na taon na relasyon, susog sa nagkapirang international media outlets.
Mantang wara pang opisyal na kumpirmasyon gikan sa duwa, nagpuon an kumpirmasyon kan nag-atendir si Bloom na solo sa kasal ninda Jeff Bezos asin Lauren Sánchez sa Mallorca. Dae nahiling si Perry sa okasyon, asin segun sa mga source na nakaolay kan People Magazine, “pretty much done” an suboot relasyon kan duwa.
Lalo pang nagkusog an orolay makalihis mapansin kan fans na haloy nang dae nahihiling na magkaiba an duwa, asin wara man na pag-tag o post sa saindang social media asin mga interview.
Saro suboot sa mga rason kan saindang pagrayo an huli sa nagin busy si Katy sa saiyang world tour na nagpuon kan Abril asin madurar sagkod Disyembre 2025.
May report man na dae suboot nag-uyon si Bloom sa desisyon ni Katy Perry na magbale sa sarong all-female space mission kan Blue Origin.
Sa sarong concierto kaini sa Australia, nagpahiwatig si Perry kan pig-aagihan na kadificilan bago kaini i-perform an sarong ballad.
Magigiromdomang nagkabistohan sinda Perry asin Bloom kan 2016 sa sarong Golden Globes afterparty. Nagkahiwalay sinda kan 2017 alagad nagkabalikan makalihis an nagkapirang bulan. Na-engage sinda kan Valentine’s Day 2019 asin ipinangaki an saindang aki na si Daisy Dove Bloom kan 2020.
Sa mga nakaaging taon, nagin bukas an duwa sa mga kadificilan kan saindang relasyon, kaiba na an pagsairarom sa couples therapy.
