Kinumpirmar kan Department of Justice na pormal na sindang nagsangat nin kaso sa korte laban sa contractor na si Sarah Discaya dapit sa mga isyu sa pagbayad nin buwis.
Segun kay Justice Spokesperson Atty. Polo Martinez, alisnunod ini sa determinasyon kan prosekusyon na igwa nin supisyenteng basehan nganing maisangat an reklamo na kinakahampang ni Discaya bilang sarong kaso.
Nadeterminar suboot kan panel of prosecutors na igwa nin ‘prima facie evidence with certainty of conviction’ na iyo an rason kun kaya dinara na sa korte an kaso .
Partikularmente na nagsangat sinda nin apat (4) na kaso nin ‘tax evasion’ laban sa kontratista na nag-ugat sa saiyang dai pagbayad nin tama kan mga kinakaipuhan na buwis para sa taxable year 2020 asin 2021.
Pig-paliwanag kan tagapagtaram kun nyata apat (4) na counts tax evasion case an isinangat huli ta sa lambang taxable year na nasambit, an nahilingan na may mga pagbalgar sa Section 254 asin 255 kan National Internal Revenue Code kan nasyon.
Sa irarom kaya kan ley na ini, an saiyang ginibo iyo an tuyong paglikay sa tamang pagbayad nin buwis asin dai man nakahiras nin totoong impormasyon manungod sa pagbayad.
An mga nasambit na kaso opisyal na isinangat sa Court of Tax Appeals kan Pebrero 3, 2026.
Afuera ki Sarah Discaya, nahahampang man sa kaparehong kaso an saiyang agom na si Pacifico ‘Curlee’ Discaya.
Alagad, aminado an Department of Justice na kumpara sa babaeng Discaya, si Curlee Discaya enot na pig-octaba an pagsangat nin kaso sa korte.
Segun ki Justice Spokesperson Martinez, nagsangat nin mosyon an kampo ni Discaya na nagin rason nganing mapundo an pagsangat kan kaso sa ngonian.
Ipinarerekunsidera kaini an pag-file kan impormasyon o resolusyon kan prosekusyon, kaya hinagad sa Bureau of Internal Revenue na magsumite kan saindang mga komento.
Huli kaini, hahalaton kan piskalya an komento kan kawanihan mantang nagpapadagos an preliminary investigation antes pormal na resolberan an reklamo asin isasangat bilang kaso.
