LEGAZPI CITY- Nagsakat sa labi sa 50 pigsususpetsarang kaso kan tigdas an pigbabantayan ngonian kan Albay Provincial Health Office kun sain pito man an kumpirmadong measles asin saro an pigsasabing nagadan kan Pebrero 17, huli sa nasabing helang.
Sa intrevista kan Bombo Radyo Legazpi ki PHO head Dr. Antonio Ludovice, pinakadakol na kaso sa provincia an nasa banwaan kan Pioduran na buminadol sa14 kaso mantang maikokonsiderar na sporadic o kalat-kalat sa iba pang banwaan asin ciudad.
Pighahalat pa man suboot kan opisyal an pagluwas kan death certificate kan pigsasabing nagadan huli sa tigdas tangarig maaraman kun kaso o kumplikasyon an rason kan mortality kun sain kaitong Pebrero 7 pa suboot kan ma-confine ini sa Bicol Regional Training and Teaching Hospital (BRTTH).
Dae pa man madeterminaran kun papanong nakaabot sa nasabing banwaan an helang alagad nagtutubod si Ludovice na transmission an nangyari kun kaya urog na nagdadakol an kaso.
Pagbubuyagyag pa ni Ludovice na 13 days old pa sana asin bagong pangaking umboy an pigkokonsiderar na pinakajoven man na naolakitan kan nasabing helang.
Sa ibong kan mga nasabing kaso, igwa man na mga banwaan na nagtetenir na wara pang kumpirmadong kaso siring kan banwaan kan Jovellar, Libon, Tiwi asin Manito.
