LEGAZPI CITY – Nagtutubod an ama kan nawawarang Bicolano seafarer na nag-aandar pa an justice system sa Pilipinas nin huli sa magayon na development sa kaso kan pagkawara kan saiyang aki.
Magigirumduman na kan nakaaging Enero 24 kan nagpasaklolo sa Bombo Radyo asin kay Presidente Marcos si Kapitan Ely Bobiles Jr., ama kan nawawarang seafarer kasunod suboot kawaran nin aksyon kan manning agency.
Pigtaram kaini sa intrevista kan Bombo Radyo Legazpi na nagkaigwa ini nin pagkakataon na makaolay Department of Migrant Workers Secretary Hans Leo Cacdac sa paagi nin close door interview kan nakaaging miyerkules.
Pigbareta saiya na nagpaluwas na nin kasuguan sa departamento si Presidente Ferdinand Marcos Jr. na isuspinde an manning agency.
Pigsabi pa ni kaini na saro ining magayon na senyales nganing matawan na nin konklusyon na suspendiron an agency asin magtao na nin impormasyon na aram ninda mapadapit sa saiyang aki.
Kun wara talagang kinaaraman suboot an agency sa pagkawara kan saiyang aki, dapat magtao sinda kan saindang salaysay nin huli ta imposibleng nagtatrabaho sana an saiyang aki asin bigla sanang nawara.
Pigtawan man sinda nin kasyertuhan kan DMW na itatao sainda an gabos na legal asisstance para sa pagdangog kan kaso na saindang isinunad laban sa manning agency.
Sa presente, an departamento na an mareport sa US Coast Guard nganing ihold an barko nganing dae na makapaglayag nin huli ta poon kan mawara an saiyang aki hasta sa ngonian an wara pa ining report sa mga port na pigdadaungan ninda.
Nanindugan si Bobiles na dawa gano kapagal kan saindang sitwasyon ilalaban ninda ini nin huli ta nagtutubod siyang “the truth shall prevail”.
