LEGAZPI CITY-Padagos na nakakaapektar sa mga komunidad sa panahon nin tag-uran an Habagat kun kaya an Departament of Health (DOH) nagpatanid sa publiko na maghagad nin tulos na konsultasyon medikal makalihis na maglusong sa tubig-baha, na posibleng kawsa kan Leptospirosis.
An Leptospirosis nagtetenir na sarong potensyal na nakakagadan alagad maiibitaran anhelang kun bulongon nin amay.
Poon Enero sagkod Agosto 8, 2026, basado sa rekord kan DOH, nasa 3,440 na kaso na nin leptospirosis sa bilog na nacion, asin 220 digdi an binawian nin buhay
Pagirumdom kan mga opisyales sa salud na an siisay man na naglusong sa tubig-baha posibleng namemeligro, ano man an edad.
An helang na ini dara kan bakterya na Leptospira, na kadaklan na naglalakop sa paagi kan ihi kan mga hayop na may helang arog kan mga kino.
An bakterya posibleng makalaog sa hawak kan tawo, bako sanang sa paagi nin mga lugad o open wounds kundi sa paagi man kan mata, dungo, asin nguso.
Huli kaini, pigrerekomendar kan ahensya an mga indibidwal na-expose sa tubig-baha na tulos na magkonsulta sa health facility ngani madeterminaran kun kaipuhan ninda nin prophylactic antibiotics, na ideal sa laog nin 24 hasta 72 oras pagkatapos na ma-expose.
Nagpatanid man an DOH na an tubig-baha, dakulang peligro nin iba pang mga helang, kabali na an influenza-like illnesses, dengue, cholera, amoebiasis, asin iba pang waterborne diseases.
Ipinapagirumdom kan mga doktor sa publiko na mantang an mga helang na ini posibleng mabulong, an pagkaatraso sa paghagad nin medikal, posibleng magbunga nin mga komplikasyon o kaya pagkagadan.
