LEGAZPI CITY — Ibinuyagyag kan Department of Health (DOH) Bicol sa ipigkondusir na 7th ASEAN (Association of Southeast Asian Nations) Dengue Day celebration na naglangkaw an numero kan kaso nin dengue sa rehiyon.
Segun ki DOH-Bicol director Dr. Napoleon Arevalo, base sa statistics puon Enero sundo Mayo ngunyan na taon, nagbaba ini nin 25% kumpara kan nakalihis na taon sa parehong peryodo.
Pighihiling man kan ahensya na an pinaka-epektibong istratehiya laban digdi an piggigibo kan barangay o an Barangay Kontra Dengue.
Kaipuhan suboot na maging consistent asin regular na ipautob an 4S strategies asin sarong magayon na ehemplo an reactivation kan 4 o’clock habit, o an once a week search kan key containers asin iba pang breeding sites kan mga lamok asin rarauton ini tuyong alas kwatro nin hapon sa kada harong.
Apwera pa kaini, nagtatabang naman suboot an Department of Education urog na kadaklan na natatamaan kan dengue an mga estudyante.
Nagbariwas na man nin kurtina na may kemikal na pangontra sa paglaog kan lamok sa kada classroom.
Segun pa ki Arevalo, nakipag-partner naman sinda sa Department of Science and Technology (DOST), local government units, asin ibang ahensya kan gobyerno ngane na mapugulan an paglakop kan virus.
