LEGAZPI CITY-Nasungkit ni Karl Eldrew Yulo an saiyang enot na gold medal sa seniors level makalihis pangenotan an floor exercise kan FIG Artistic Gymnastics World Cup Series na isinagibo sa Antalya, Turkey.
Namayagpag an 18-anyos na gymnast makalihis mairehistro an 14.100 puntos sa final round, kun saan nakakuwa siya nin 5.3 sa difficulty asin 8.8 naman sa execution.
Nagtapos si Karl sa ikaapat na puwesto sa qualification round bago nagpahiling nin mas makusog na performance sa final.
Panduwa saiya si Eamon Montgomery, an pambato kan Ireland na igwang 13.833 puntos para sa silver medal, mantang si Rayderley Zapata kan Spain an nakakuwa kan bronze medal sa rekord na 13.333 puntos.
Si Karl Eldrew, an tugang ni two-time Olympic champion na si Carlos Yulo.
Naenot na man siyang nagpahiling nin tibay sa World Cup leg sa Baku, Azerbaijan, kun saan nakaabanse siya sa finals kan floor exercise asin horizontal bar.
