LEGAZPI CITY- Pormal nang nanumpa sa Kamara de Representantes an bagong representante kan Ako Bicol Party-list na maribay sa iwinalat na posisyon kan ginadan na si Cong. Rodel Batocabe.
Makakaibanan na ninda AKB Party-list Representatives Chistopher Co asin Alfredo Garbin Jr. sa pag-otob sa sinumpaang trabaho sa natatadang panahon an ikaapat na nominee kan partido na si Atty. Ronald Ang.
Mismong si House Majority Leader Rolando Andaya Jr. an nag-motion para sa lakdang asin si Speaker Gloria Macapagal-Arroyo man an nagpanumpa ki Ang.
Sarong corporate lawyer si Ang asin nagtitindog na Vice President for Luzon Tourism Congress of the Philippines.
Magigirumduman na nasa hudyan na termino na kuta si Batocabe asin nakatalaan na ipagpadagos an political career sa pagdalagan sa mayoralty race sa Albay kan gadanon sa sarong gift-giving event sa banwaan kan Daraga.
Ipigtukdo kan pulisya an makakatapat kuta kaining si incumbent Daraga Mayor Carlwyn Baldo bilang suboot “mastermind” sa panggagadan na maduon man na pigninigaran kan alkalde.
Mientras tanto, kumpiyansa man an nawalat na pamilya kan lehislador na harani nang mapasakamot an hustisya katakod kan pag-usad kan kaso asin mga nagluluwas na developments sa nagpapadagos na imbestigasyon.
