LEGAZPI CITY – Nanindugan an Legazpi City Police Station na katuwang sinda kan publiko nganing matuldukan na an Violence Against Women and Children (VAWC).
Segun ki Legazpi City Police Station Chief of Police Police Lieutenant Colonel Domingo Tapel Jr., sa intrevista kan Bombo Radyo Legazpi na bukas an saindang Women and Children Protection Desk (WCPD) nganing tawan nin aksyon an saindang problema mapadapit sa pang-aabuso asin pangungulog sa mga kaakian asin kababaihan.
Pagsyerto niya man na an mga report na mareresibi ninda an magtetenir na confidential asin an namamayo sana kan Women and Children Protection Desk an may direchos na magkapot asin mag-aram kan impormasyon kan mga biktima.
Kadaklan man suboot sa mga suspetsado sa mga insidente nin pangungulog sa mga kaakian asin kababaihan iyo an saindang ama, agom, boyfriend asin mga dating naka-relasyon.
Pigtaram pa kan opisyal na kalimitan sa mga nareresibi nindang sumbong an nauuli na sana sa pagkaka-ayos kan mag-inibong na lado asin dae na nauuli sa pagsusunad nin kaso.
Afuera sa saindang WCPD an nagkokondusir man sinda nin mga lecture asin discussion sa kada barangay kun sain pig-iimbitaran ninda an mga kalalakihan huli ta sinda an kalimitang nagbabayolar sa Anti-Violence Against Women and Their Children Act of 2004.
Pagdoon pa ni Tapel na pasensya na sana suboot sa mga kalalakihan kun masusunadan sinda nin kaso urog na kun nangulog sinda nin kababaihan asin kaakian.
.){kind=link}