LEGAZPI CITY-Ikinaogma kan defense team ni Vice President Sara Duterte an nagin desisyon kan Korte Suprema na nagdeklara sa mga artikulo kan impeachment laban sa bise bilang unconstitutional.
Segun sa opisyal na pahayag kan saiyang defense team, an desisyon kan Kataas-taasang Hukuman, nagpatibay sa saindang pagtutubod na an ika-apat na reklamong impeachment igwang pagbayolar sa one-year ban na itinalaga kan Article XI, Section 3(5) kan 1987 Konstitusyon.
Segun sa kampo, an unanimous decision, bako sana matrayumpo para sa Bise Presidente, kundi sarong pagpapakusog sa rule of law asin babala laban sa mali na paggamit kan proseso kan impeachment.
Pigsierto kan grupo na handa sindang saguton an anumang alegasyon sa tamang panahon asin sa katakod na forum.
Magigirumduman na kan poon kan Disyembre 2024, apat na impeachment complaints an isinangat laban kay VP Duterte.
Kairiba sa mga paratang an graft and corruption, betrayal of public trust, asin an kontrobersyal na pag-amin sa sarong assassination plot laban kay President Marcos, First Lady Liza Araneta, asin House Speaker Martin Romualdez.
An ika-apat na reklamo, isinampa kan Pebrero 5, 2025, asin inendorso kan 215 miyembro kan House of Representatives, kaya naipasa ini sa Senado para sa trial.
Alagad kan Hunyo 2025, nagdesisyon an Senado na ibalik an mga artikulo kan impeachment sa Kamara, asin dai ipinadagos an paglilitis.
Sa huri, nagpaluwas nin desisyon an Korte Suprema na nagsasabing nagbayolar sa Konstitusyon an ika-apat na reklamo huli sa pagbayolar sa one-year rule.
