LEGAZPI CITY-Pignegran kan kampo ni dating Department of Public Works and Highways (DPWH) Engineer Brice Hernandez an report manungod sa recantation o pagbawi niya kan saiyang testimonya katakod kan maanomaliyang flood control projects.
Segun sa saiyang abogado na si Atty. Ernest Levanza, bako totoo an pigsasabing recantation asin lilinawon ninda an isyu sa pagdangog kan Senate Blue Ribbon Committee sa Enero 19.
Sinabi man ni Sen. Panfilo Lacson, chairman kan Blue Ribbon Committee, na pagoolayan ang mga isyu asin nagpatanid na an sisay man na mabawi kan testimonya posibleng magbayolar bilang perjury huli sa sinumpaang mga pahayag.
Nilinaw man kan Department of Justice (DOJ) na wara pa sindang nareresibe na affidavit hale kay dating DPWH District Engineer Henry Alcantara na nagbabawi kan saiyang testimonya.
Segun sa ahensiya, wara man nin nakasurat sa saiyang counter-affidavits na pigbabawi niya an saiyang mga naenot nang pahayag, mantang dati na niyang pignegaran an pagkakaimbuelto sa mga ghost flood control projects.
