Dai na isasabay kan Department of Health an mga road violators na imbwelto sa mga aksidente sa zero balance billing policy sa mga pampublikong ospital.
Ini an ipighayag ni DOH Secretary Teodoro Herbosa.
Ginibo ni Herbosa an anunsyo sa sarong joint press conference na ginibo sa Mandaluyong City kaiba si Jean Todt, an United Nations Secretary-General’s Special Envoy for Road Safety.
Segun sa kalihim, dae na tatawan nin libreng ospital sa irarom kan programa an mga inaapod na “kamote riders” asin iba pang reckless na mga motorista.
Dae man sinabi ni Herbosa an partikular na oras kun nuarin mapuon an pag-implementar kan bagong polisiya.
Alagad, tulos man suboot na ipapaabot ini kan DOH sa gabos na ospital.
Piglinaw kan kalihim na maski dae na kabali sa zero balance billing policy an mga road violators, maa-admit pa man giraray sinda kun maidara sa mga ospital.
Piglinaw ni Herbosa na sakop pa man giraray kan zero-balance billing policy an mga biktima nin aksidente sa tinampo asin road traffic injuries kun wara man sindang sala.
An planong ini kan DOH parte kan pinakusog na kampanya kan ahensya manungod sa road safety.
An mga aksidente sa tinampo an nagtetenir na pangenot na kawsa nin kagadanan kan mga Pilipino sa nasyon.
Pigkakarkulong mga 12,000 na Pilipino an nagagadan taon-taon sa aksidente sa tinampo.
An pinakahalangkaw na numero iyo kan 2024 kan ini uminabot sa 37,000 na nagadan.
Naglalaom si Herbosa na huli sa polisiya kan DOH, mas magiging disiplinado an mga motorista sa pagsunod kan mga ley trapiko.
