Nakatalaan na aprobaran ngonian na semana kan Kamara de Representantes an sarong ley na sertipikadong urgent ni Ferdinand Marcos Jr. na matao sa Presidente nin kapangyarihang temporaryong bawasan o suspendiron an excise taxes sa mga produktong petrolyo nganing masimbagan an naglalangkaw na presyo kan langis.
Sa irarom kan House Bill 8418, pwedesir iimplementar kan Presidente an pagbawas o pagsuspinde kan buwis sa gasolina asin iba pang fuel products kun igwang matinding paglangkaw kan presyo kan langis sa global market o sa panahon nin national emergency.
Segun ki House Majority Leader Ferdinand Alexander ‘Sandro’ Marcos, obheto kan bill na tulos na matawan nin ginhawa an publiko antes maglangkaw an pamasahe, presyo nin pagkakan, asin iba pang gastos.
Pwedesir iimplementar an tax relief kun an average na presyo kan Dubai crude oil an minaabot o minalampas sa $80 kada bariles sa laog nin sarong bulan, o kun an sarong national emergency idineklara na nagigin rason nin dakulang paglangkaw kan presyo kan langis.
Piglinaw kan bill na an suspensyon o pagbawas kan mga buwis an sagkod sana sa anom na bulan asin dai dapat maglampas sa kabilugan na sarong taon, asin pwedesir gamiton kan Presidente an kapangyarihan na ini sagkod sa Disyembre 31, 2028.
