LEGAZPI CITY – Dapat suboot na maghagad nin dispensa asin magbasol an mga lider kan Kamara huli sa ginibong pag-apruba kan death penalty bill kasuodma.
Segun ki Albay 1st district Rep. Edcel Lagman, kaipuhan suboot na magbasol an mga ini para sa ‘walong kasalan’ na may koneksyon sa pagkonsiderar kan padusang kagadanan.
Segun pa sa opisyal, pagbalgar suboot sa kasagraduhan kan buhay an railroading kan death penalty bill asin pagpasipara sa tratadong inaprubaran kan nasyun na nagbabawal sa pagbabalik kan death penalty.
Garo man sana suboot isinaksak sa shredding machine an mga polisiya kan Kamara huli sa basta sana kun balgaron kan mayorya mailusot sana an pag-apruba kan House Bill 4727 na pigsasabi ni House Speaker Pantaleon Alvarez na top priority measure kan Duterte administration.
Apwera digdi, sinabi ni Lagman na garo man sana suboot pigbubusalan kan liderato an mga kontra sa propuesto huli sa marekas na pagsasara kan debate maski na may 18 pang interpellators an dae nakakahapot asin debate sa plenaryo.
Dugang kaini, dae suboot inagi sa tamang proseso an pag-amiyenda sa House Bill 4727 asin bastang ibinasura an saindang mosyon para sa nominal voting maski na pigtutugutan ini sa irarom kan saindang rules.
