LEGAZPI CITY-Pigbusisi kan Pribadong Piskal na si Atty. James Bryan Ibrahim Alih sa testigong Office of the Ombudsman Records Division OIC Atty. Karen Batu manungod sa mga idineklarang negosyo ni Vice President Sara Duterte kan saiyang enot na termino bilang alkalde kan Davao City.
Nangyari ini sa ika-25 aldaw kan impeachment trial kontra sa Bise Presidente.
Hinapot ni Atty. Alih si Batu manungod sa acquisition cost o kapital na nairehistro sa mga Statements of Assets, Liabilities and Net Worth (SALNs) ni Duterte ,partikularmente manungod sa mga negosyo na nakalista na sa saiyang 2007 SALN.
Kinumpirmar ni Batu na, basado sa tulong dokumento, wara nin ipinahayag na acquisition cost—na nagin rason kan pagpuna kan piskal mapadapit sa pagkakaigwa nin negosyo alagad warang nairehistrong puhunan sa kapital.
Sinabi man kan testigo na warang mga stocks na idineklara sa 2007 asin 2009 SALN ni Duterte, afuera sa 2008 SALN, na nakalista an “mga stock equity paid.”
Kan hinapot kan prosekusyon kun ini nangangahulugan na igwa nin mga negosyo alagad wara nin idineklarang pamumuhunan sa kapital, sinabi ni Batu na ini mismo an ipinaparisa sa opisyal na dokumento kan Ombudsman.
An pagriribayan na ini kan duwang lado parte kan pagpresentar kan piskalya kan mga rekord kan Ombudsman sa irarom kan Article II kan impeachment case.
An akusasyon nakasentro sa mga alegasyon nin dai maipaliwanag na yaman, mga salang deklarasyon sa SALN, asin pagmantenir nin pakikipagtabangan sa negosyo mantang nagkakapot nin pampublikong opisina.
