LEGAZPI CITY – Kinumpirma kan Department of Trade and Industry an nanotaran an padiit diit na kakulangan sa suplay kan basic commodities sa rehiyon kan Bicol partikularmente sa apat na probinsya apwera sa Masbate asin Camarines Norte.
Segun ki Joseph Rañola, Assistant Regional Director kan Department of Trade and Industry o DTI Bicol, sa intrevista kan Bombo Radyo Legazpi, ini makalihis na ma-stranded an mga delivery trucks na gikan sa mga supplier huli sa mga pagbaha sa probinsya kan Camarines Sur.
Dugang pa ni Rañola, nagkaigwa man suboot nin panic buying antes asin magin pakalihis kan bagyo.
Kakaipuhanon pa sa ngunyan na pag-adalan sa laog nin 2 hasta 3 aldaw antes na maibalik sa normal an suplay kan mga pangenot na barakalon lalo sa mga probinsya na epektibo an price freeze makalihis an deklasrasyon nin state of calamity.
Mientrastanto, sinugo na man suboot kan saindang opisina na magpautob nin komprehensibong assessment sa mga lokal na gobyerno na nakakamati nin kakulangan sa suplay kan basic necessities sa rehiyon.
Sa presente, siniguro ni Rañola na sa masunod na aldaw, na mabalik na sa normal an sitwasyon kan suplay kan pagkaon sa Bicol mientras na passable na man an tinampo na sakop kan Milaor asin San Fernando, Camarines Sur na nakaapektar sa biyahe kan deliveries asin tracking na pasisiring sa nabanggit na apketadong rehiyon.
Mientrastanto, nagpagirumdom man ang opisyal sa mga business owner na nagpapabakal nin basic necessities asin prime commodities manungod sa eksistidong implementasyon kan price freeze sa mga probinsya na sakop ka state of calamity.
