LEGAZPI CITY — Inako kan pamayo kan Bacacay Municipal Police na nadidifisilan sinda sa pagdakop sa mga iligal na parasisira sa kadagatan na sakop kan nasambitan na banwaan huli sa kakulangan sa pondo asin kawaran nin mga behikulong pandagat.
Segun ki Police Inspector Marcos Bea, Deputy Chief of Police kan Bacacay PNP, kun sinda mismo na mga pulis an mapasiring sa mga isla ngani na mangdakop, talagang madidifisilan sinda kun kaya nangapudan ini sa mga nagpapaabot nin reklamo na magtabang man sa pagdakop kan mga illegal fishermen.
Inako kan opisyal na wara sindang laban sa mga maririkas na behikulo na pigagamit kan mga parasisira na ini.
Dugang pa ni Bea na bako madali an pagkokundusir nin mga operasyon sa kadagatan maski panigwang mga coastal ranger na nakadesignar sa lambang munisipyo.
Katakod kaini, nangapudan an opisyal na kinakaipuhan na magkaigwa an banwaan nin local executive huli ta igwa man sana ining pondo na nakatagama sa pag-implementar kan ley.
Maski gurano suboot kagayon an plano asin programa kan kapulisan, wara ining kakaluwas kun wara man sinda na pondo.
Mientrastanto, pigsiyerto man ni Bea na dae mapundo an PNP sa pagibo sa saindang mga trabaho asin padagos na magseserbi sa mga ciudadano.
