LEGAZPI CITY- Nanindugan an organizer kan Kakampink 102 na dagos an pagpapabakal nin bagas sa kantidad na P20 sana sa ibong kan nareresibing pangbabash sa nagkakapirang netizens.
Sa intrevista kan Bombo Radyo Legazpi kay Dindo Bataller na saro sa mga organizer kan Kakampink 102, aminado ining namumundo na may nagkakapira pa an nakakapagkomento nin negatibo sa saindang programa maski pa obheto sanang makatabang sa kapwa lalo na sa mga nagtitios.
Alagad saro sa mga nagdara nin pagkahandal kay Bataller an post sa social media kan sarong pulis haling Nueva Ecija na naghumang bubugbogon suboot siya kung dae magigibong makapagpabakal kan P20 na bagas aru-aldaw.
Segun kay Bataller, inireport niya na sa Police Regional Office 3 an nasabing post kan pulis ngani na mapagsabihan na.
Tulos man suboot na nagdeactivate kan saiyang account an dae na pinangaranan pang pulis makalihis na makaresibe man nin mga pangbabash hali sa ibang netizens.
Desidido si Bataller asin pag-iriba sa saindang grupo na magsangat nin magkakanigong kaso kung dae man giraray magsasagsibo nin public apology an nasabing pulis.
Napag-araman na haros suro-semana na naglilibot sa saindang barangay sa Ligao City an Kakampink 102 ngani na magpabakal sa mga residentes nin baratong bagas sa kantidad na P20 sana.
