Miss Amazing 2019 during Magayon Festival 2019’s PWD Day
LEGAZPI CITY — Kinoronahan an sarong orthopedically-impaired sa ikinondusir na pinaka-enot na Miss Amazing 2019 na aktibidad kan Provincial Social Welfare and Development Office (PSWDO) katakod kan month long celebration kan Magayon Festival 2019.
Sa intrevista kan Bombo Radyo Legazpi ki PSWDO chief Eva Grageda, an nasabing aktibidad an highlight kan PWD Day na obhetong i-showcase an inner qualities kan kada personang may kaditan tangarig na mabilog an saindang self-confidence asin maging inspirasyon sa ibang tawo.
Segun ki Grageda, mawot kan provincial government na maipamate sa mga PWD na normal asin importanteng sektor sinda sa sociedad.
Kabali sa beauty pageant an mga visually impaired, orthopedically impaired, asin hearing-impaired hale sa enterong provincia.
Iniheras pa kan PSWDO chief an ibang aktibidad kan ahensya siring kan search for Gayon Lola, Munting Prinsipe at Prinsesa, Solo Parents Day o an ballroom dancing contest, asin an Kalipi Day.
Mientras tanto, segun man ki Best in Talent asin Miss Amazing 2019 Jhona Peña kan Malinao, maski na amputated an tuo kaining binti asin fractured an walang binti, maogma ini huli sa kadakol na eksperyensya asin naaraman pa suboot kaini an iba niyang kakayahan.
Pangapudan man ni Peña sa kapwa PWD na bako kaulangan an kaditan tangarig ipadagos an mga pangaturugan sa buhay.
Afuera ki Peña, 1st Runner Up si Vanessa Aubrey Marie Bataller kan Legazpi City na nakua man an Best in Long Gown, 2nd Runner Up an taga-Bacacay na si Katherine Belaro, Best in Sports Wear si Claire Abegail Buergo kan Malilipot asin Achievement Awardee si Ferdelyn Bongon kan Tabaco City.
