LEGAZPI CITY — Nagpapadagos hasta sa ngunyan an pag-enganyar kan Philippine Army sa iba pang mga miyembro kan rebeldeng New People’s Army na magsurendir na asin makipagtabangan sa gobyerno.
Ini an katakod kan pagsurendir kan nasa 19 na mga NPA kun sain kaibanan an sarong 15-anyos na miyembro na pigtataram na na-recruit kan mga rebelde.
Segun sa Brig. Gen. Fernando Trinidad, commanding officer kan 903rd Infantry Brigade, an mga nagsurendir suboot an kaibanan sa mga naghihirong pwersa kan NPA sa Masbate asin nagdesisyon na magsurendir na huli sa kadifisilan kan buhay na saindang naeekperyensyahan sa pagtatago sa mga kabubuludan na parte kan probinsya.
Dugang pa kan opisyal na haros wara na suboot na makaon an mga ini asin dae nangingiturog kada magkakaigwa nin miliray operations.
Pagbuyagyag man kan mga rebelde na dae man sainda naitatao an mga promesa kan mga lider kan NPA asin napapabayaan an saindang pamilya kaya nagdesisyon na magsurendir na.
Mientrastanto, napag-araman na dakol pa sa mga kaibanan kaini an nagpaplano na makipagtabangan na man sa gobyerno kun kaya pinaglalaoman kan militar na igwa pang mga masurendir sa mga masunod na mga aldaw.
