Nag-aandam an US sa pag-abot kan pigkokonsiderang “Monster Storm” na magdadara nin mahibog na yelo.
An siring na monster storm an makakaapektar sa dakulang parte kan Amerika.
Piglalaoman an yelo na sagkod sa 16 pulgada an hibog na maabot sa 2,000 milya poon Texas sagkod New England.
Huli kaini, kadakol na mga biahe an nakansela sa manlaen-laen na parte kan Estados Unidos.
Sinabi ni Homeland Security Secretary Kristi Noem na pina-activate niya an National Response Coordination Center nganing bantayan an bagyo asin maghagad nin federal suport para sa mga apektadong lugar.
Nagpreposisyon man sinda nin 30 generator, 250,000 na pagkakan, 400,000 na litro nin tubig, mga tamong, kakanon kan mga omboy, asin nagkapirang essential na supplies.
Nagdeploy man sinda nin tulong Incident Management Assistance Teams (IMATs) na may dagdag na 15 teams na naka-standby, 28 urban search and rescue teams an naka-standby man.
Nagkapirang estado arog kan Kansas, Washington DC, Philadelphia an nagdeklara nin “State of Disaster Emergency”.
