LEGAZPI CITY- Kapot kan Albay an pinakadakol na nairehistrong insidente kan panghahabas nin mga volcano monitoring instruments sa nakalihis na pitong taon sa bilog na Pilipinas.
Ini an kinumpirmar ni Philippine Institute of Volcanology and Seismology (PHIVOLCS) Director Renato Solidum sa ekslusibong intrevista kan Bombo Radyo Legazpi.
Segun ki Solidum, kadaklan sa mga nawarang instrumento kan ahensya an nakatutok sa pagbabantay kan bulkang Mayon na yaon sa nasabing provincia.
Katakod kaini, nagtutubod si Solidum na mareresolberan sana an problema kun madadakop an mga posibleng nasa likod kan mga panghahabas.
Sinayumahan man kan opisyal an ipigsusuhestiyon kan nagkapira na mag-empleyo na sana nin tawo na mabantay sa mga nasabing instrumento urog na mas mapapagastos pa suboot digdi an ahensya.
Huli naman ta bako na mandato an magdakop sa mga posibleng responsable sa panghahabas, hagad kan opisyal an tabang kan lambang saro sa pagbabantay.
Dae naman ipighayag pa ni Solidum an eksaktong numero kan mga nahabas na gamit durante kan nasabing peryodo alagad ngonian sanang taon kan mairehistro man an tolong insidente nin panghahabas kan battery packs sa banwaan kan Guinobatan asin lugar na sakop kan ciudad kan Legazpi asin banwaan kan Sto. Domingo.
