LEGAZPI CITY- Kinumpirmar kan Integrated Coastal Management Unit na negatibo an mga kadagatan sa palibot kan ciudad nin Legazpi sa presensya kan nakakahudong asin nakakagadan na box jelly fish.
Sa intrevista kan Bombo Radyo Legazpi kay Ben Redito kan Integrated Coastal Management Unit-Legazpi, sa isinagibong paglilibot kan saindang team sa mga coastal areas wara naman nin presensya kan box jelly fish partikular na sa baybayon kan Barangay Padang asin Buenavista kung sain ini huring nahiling.
Ipinaabot naman suboot an resulta kan inspeksyon sa City Disaster Risk Reduction Management Office na iyo na an mapaluwas nin abiso sa mga local government units.
Pinagtutubudang epekto ini kan hanging amihan na nagkakawsa nin ukol na nagdadara sa mga jelly fish pasiring sa baybay kung kaya ini nagagadan.
Dagdag man suboot an pagdakol man kan mga sea turtle na paboritong magkaon kan mga nasabing box jelly fish.
Sa ibong kaini, mantinido an abiso kan Integrated Coastal Management Unit sa publiko na magtinir na alerto asin maingat sa paglalangoy asin tulos na magreport en kasong makahiling pa nin anuman na klase nin hayop na posibleng magdara nin peligro sa publiko.
