LEGAZPI CITY — Inasegurar kan Philippine Institute of Volcanology and Seismology (Phivolcs) na dae maapektaran an kabilugang pagbabantay kan ahensya sa aktibidad kan bulkan huli sa pagkawara kan mga gamit sa pag-monitor kan Bulkang Mayon.
Liwat na naman kayang nawara an gadget sa hydrology monitoring station kan Phivolcs siring kan duwang battery
packs asin duwang solar panels.
Segun ki Phivolcs resident volcanologist Dr. Ed Laguerta, an istasyon kan Phivolcs sa Barangay Padang, ciudad kan Legazpi an nagkokolekta kan temperature, salinity asin pH level kan tubig.
Alagad sa ibong kan insidente, dae man suboot maapektaran an kabilugang monitoring sa bulkan huli sa igwa pa man na ibang hydrology station na itinindog an Phivolcs sa palibot kan bulkan.
Nangapudan man an Phivolcs sa publiko na dae i-vandalize an gadgets na naka-install sa remote stations huli sa may epekto man liwat ini sa monitoring asin assessment kan kondisyon kan bulkan.
Hagad pa kaini an pakikipagtabangan kan gabos na mapangataman an mga gamit sa palibot kan Mayon para man sa seguridad kan mga namamanwa.
