Nagperform an Canadian pop star na si Justin Bieber sa India sa kasal kan aki kan pinakamayamang lalaki sa Asya.
Ini an kasal ninda Radhika Merchant asin Anant Ambani, an aki ni Mukesh Ambani an ika-11 sa pinakamayamang tawo sa kinaban na may net worth sa $113 billion.
Kaiba sa mga kinanta ni Bieber an saiyang hit song na “Sorry” sa hampang kan mga VIP siring ninda Bollywood star Salman Khan asin dating India cricket captain M.S. Dhoni.
Dae naman isinapubliko pa kan singer kung pira an saiyang naresibing bayad sa event alagad base sa mga report nasa $10 million an talent fee kaini.
Alagad bako pa ini an mismong kasal ninda Radhika asin Anant huli ta sa Hulyo 12 pa mapuon an tolong aldaw na Hindu ceremony para sa saindang wedding.
Magigirumduman na kan nakalihis na Pebrero kan maimbitaran man kan soon-to-be husband and wife si Rihanna ngani na magperform sa saindang event sa Gujarat, India.
