LEGAZPI CITY — Dae nagbabago an paninindogan kan Junta Provincial kan Albay katakod kan isyu kan pagpapahale asin pagribay sa authorized agent corporation kan Philippine Charity Sweepstakes Office (PCSO) na nagkakapot sa small town lottery operations sa provincia.
Sa intrevista kan Bombo Radyo Legazpi ki Vice Governor Harold Imperial, apektado na suboot an pangaran kan bilog na Albay kun napapag-olayan an isyu sa Lucky V Prime Enterprises na nangengenot sa operasyon kan STL.
Segun sa bise gobernador, dapat sanang maribayan an nasabing AAC urog na kun dae man naootob an mga obligasyon.
Ipighayag man kan opisyal an mga enot nang isinagibong committee hearing sa kaparehong obheto alagad tinawang-duon na PCSO man giraray an may poder na magregulate asin maghale kan itinaong prangkisa sa nasabing korporasyon.
Magigirumduman na kan nakaaging taon kan pagbabadilon kan riding in-tandem suspects an behikulong kinalulunadan ni STL Chairman Alex Alemania na nagibo pa kutang maidalagan sa ospital alagad binawian man giraray nin buhay.
Nakasurat man sa affidavit kaini antes na magadan an mga pigtutubudang nasa likod kan krimen kun saen kaibanan na an nagkapirang board of directors kan Lucky V.
