LEGAZPI CITY – Nagsagibo nin site disinfection an mga personahes kan Juban Municipal Disaster Risk Reduction and Management Office sa mga nagkapirang eskwelahan sa lugar na may pigtutubudang kaso ni hand foot and mouth disease.
Segun kay Arvee Logronio, an head kan MDRRMO Juban sa intrevista kan Bombo Radyo Legazpi na nagrequest an mga nagkapirang eskwelahan sa munisipalidad para sa disinfection kan saindang pasilidad nganing maportihiran an mga estudyante sa huma kan nasambitang helang.
Nakikipagkoordinar na man suboot sinda sa mga health agency nganing matawan nin magkakanigong aksyon an paglakop asin pagdakol kan hand foot and mouth disease sa saindang munisipalidad.
Nagin lakdang na ini kan saindang opisina na mag-invest para sa mga disinfection equipment poon kan naglakop an epekto kan Covid-19 sa nasyon asin nagagamit na ngunyan an mga ini nganing mairayo an mga estudyante sa mga peligrosong helang.
Pigtawan doon ni Logroio na nagsasagibo man sinda nin disinfection bako lang nganing masugpo an mga helang kan para sa tawo kundi pati na man mga helang sa mga hayop arug kan african swine fever.
Nagtetenir na bukas man suboot an saindang opisina nganing magsagibo nin disinfection sa mga government offices na mawot kan saindang asistensya asin tabang.
Pagirumdom kaini sa publiko na ingatan an mga sadiri nin huli ta bako lang mga umboy asin jovenes an pwedesir tamaan kan hand foot and mouth disease asin dae na pagpalaugon an mga infected na estudyante sa mga eskwelahan nganing maibitaran an exposure asin harawaan.
