LEGAZPI CITY – Maswerteng naibitaran an posibleng kagadanan kan 17 anyos na lalaki na pinukpok nin kaputol nin botong na nagtama sa saiyang angog sa Barangay Cawayan banwaan kan Malilipot.
Binisto an biktimang si Johnwel Bemeda, residente kan P-4, Brgy. Comon, Tabaco City.
Segun sa biktima, nakalunad siya sa saiyang motorsiklo ngane sunduon an amigong si Raymond sa Sitio Palale, San Isidro.
Pag-abot suboot niya sa lugar, may sarong lalaki na nagwawala asin basta sana siya nirapado nin kapisadong botong na tuminama sa saiyang angog.
Huli sa kusog kan tama saiya, natumba ini sa saiyang piglulunadan na motorsiklo.
Dugang pa kan biktima na kan magdiklom an saiyang paghiling, saro pang lalaki an nagrane saiya hale sa likudan na may armas na badil asin pinaputukan siya nin pirang beses.
Nakadalagan man tulos si Johnwel pasiring sa barangay hall asin naghagad nin tabang ngane darahon ini sa ospital.
May tama nin bala an joven sa wala kaining takyag, may rungas sa angog, tuong kamot asin may bakros pa sa tuhod.
Sa ngunyan, pig-iimbestigaran pa kan mga otoridad an motibo sa nangyaring krimen asin pig-aaram an pagkakabisto sa suspetsado.
