LEGAZPI CITY- Duwang menor de edad na lalaki an naimbwelto sa sarong seryosong aksidente sa Barangay San Pedro, banwaan kan San Pascual, Masbate.
Sa isinagibong imbestigasyon kan San Pascual Municipal Police, nagluluwas na lunad kan saiyang motor si Anjo Andales, 17-anyos kaibanan an saro pang 17-anyos na saiyang backride gikan sa Barangay San Rafael.
Pagkaabot kan mga ini sa hampangan kan sarong rancho, aksidenteng nakabangga an pigmamanehong motor sa sarong kahoy nin Gemilina na nagresulta sa mga seryosong lugad sa hawak kan duwa.
Idinalagan an mga ini sa pinakaharaning ospital alagad idineklarang dead on arrival an drayber na si Andales mantang padagos pang pig-oobserbaran an saro pa.
Isinairarom sa otopsiya an hawak kan biktima asin ibinugtak sa kustodiya kan San Pascual MPS an motor na ginamit sa aksidente na nakarehistro sa sarong Hermogenes Laurio.
