LEGAZPI CITY—Puga-puga an preparasyon kan mga kapulisan sa banwaan kan Jovellar katakod kan pag-obserbar kan Undas 2025.
Segun ki Jovellar Municipal Police Station Officer in Charge Police Captain Rufino B.Casagan, sa intrevista kan Bombo Radyo Legazpi, nakalatag na an saindang mga personahes sa manlaen-laeng kamposanto sa nasabing lugar nganing i-asigurar an seguridad digdi.
Puon pa suboot kan nakaaging semana an pirmehan na sindang nagbibisita sa mga sementeryo nganing hilingon kun may mga gibo digdi na bako nakakamarhay sa mga namamanwaan, siring man nganing i-check an mga ipigbabawal na bagay sa laog kan kamposanto.
Nakabugtak suboot an saindang mga personahes sa laog kan mga kamposanto, sa mga checkpoint area siring man sa pagmanehar kan bulos nin trapiko.
Nagpagiromdom man an opisyal sa publiko na ibitaran an pagdara nin mga bagay na pwedesir takaw-atensyon sa mga manghahabon.
Ipigbabawal man an pagdara nin matatarom na bagay, armas, asin pag-inom nin arak sa laog kan kamposanto.
Mientrastanto, nagmamawot man an saindang ofisina na magin salbado asin magin zero-crime an saindang banwaan katakod kan pag-obserbar kan Undas.
