LEGAZPI CITY – Nagpahayag nin suporta asin partisipasyon an Legazpi-Daraga Jeepney Operators Drivers Association sa gigibuhong tigil-pasada kan Condor Piston Bicol.
Magigirumduman na mapoon an nasabing transport strike alas-6 nin aga sa Abril 21 asin nakatalaang magtapos alas-6 nin banggi sa Abril 22.
Segun ki Legazpi-Daraga Jeepney Operators Drivers Association President Edison Briones sa intrevista kan Bombo Radyo Legazpi na mawot nindang maparalisa nin 100% an transportasyon nganing kalampagon an gobierno sa tahaw kan nagpapadagos na krisis sa nacion.
Bako man suboot supisyente an duwang semanang magkasunod na rollback huli ta nagtetenir na halangkaw an presyo kan diesel kumpara sa presyo kaini kan dae pa nagkakaigwa nin kariribukan sa Middle East.
Aminado man siya na abo man ninda na naghahantong sa tigil-pasada nganing madangog sana an saindang pangapodan huli ta nasasakitan an mga commuter sa saindang lakdang alagad wara sindang maginibo huli ta wara sindang nareresibing tabang gikan sa gobierno.
Pigtaram pa kan opisyal na basado sa saindang pakikipag-olay sa Land Transportation Franchising and Regulatory Board Bicol na nakahold an pondo na ibabarewas sainda sa Department of Social Welfare and Development.
Kahagadan ni Briones sa mga commuters sa rutang Legazpi-Daraga asin vice versa na sabuton an saindang ikakasar na duwang aldaw na tigil-pasada huli ta mawot nindang ilaban an saindang diretsos sa gobierno.
