Naalarma an gobyerno kan Japan sa anunsyo kan Russia na pagsasagibo nin mahiwasan na military drill kaiba an China sa sakop nindang kadagatan puon Setyembre 1 hasta 7.
Sa pahayag ni Chief Cabinet Secretary Hirokazu Matsuno, kinondena kaini an lakdang kan duwang higanteng nasyun na bako suboot na kaako-ako lalo na ta harani sa lugar an saindang mga isla.
Nangapudan si Matsuno na dae na ipagsabay pa sa military excercise an mga lugar na harani sa saindang teritoryo lalo pang magdadara ini nin peligro para sa mga residentes.
Nakikipagkoordinar naman suboot an gobyerno kan Japan sa Russia ngani na mahigot na mabantayan an dalagan kan nasabing military drill.
Pinaglalaoman na maabot sa 50,000 na mga suldado, 5,000 na weapons units kaiba an 140 fighter jets asin 60 barkong panggera an makakasabay sa aktibidad.
Sa ibong na lado, enot naman na inihayag kan Russia na bako man na konektado sa nagpapadagos nindang gera kontra sa Ukraine an ilulunsar na drill na inapod kaining Vostok 2022 exercise.
Alagad dae man kinumpirmar kung kaiba sa military excercise an pwersang ipapadara sa Ukraine.
Apwera sa China, makakasabay man kan Russia sa iba pang mga drills sa manlain-lain na lokasyon an mga kaalyadong nasyun siring kan India, Laos, Mongolia, Nicaragua, Syria asin mga dating miyembro kan Soviet Union.
