LEGAZPI CITY – Nilinaw ni Albay Gov. Al Francis Bichara an dapit sa mga huruding-huding sa social media na pigpapapundo kaini an anti-rabies program kan Bicol Regional Training and Teaching Hospital (BRTTH).
Sa ipinaluwas na anunsyo kan gobernador sa saiyang facebook account, sinabi kaini na wara mang bilog na kontrol an gobyerno provincial sa nasabing ospital huli sa nasa irarom an BRTTH kan national government.
An mga district asin municipal hospitals sana suboot an pinamamayuhan kan probinsya arog na sana kan Ziga Memorial District Hospital, Cagraray Municipal Hospital, Villa Hermosa Hospital, Rapu-Rapu Hospital, Manito Hospital, J.B. Duran District Hospital, Pantao Hospital, asin Pio Duran Hospital.
Huli ta ini an mga ospital na nasa irarom kan provincial government, pighihiling kan gobernador na tawan ini nin mga resources.
An gobyerno provincial sana kaya an solamenteng mapagkukuwaan nin budget kan mga naunambitang ospital bakong arog kan BRTTH na pwedesir maghagad nin pondo sa Department of Health.
Dugang pa ni Bichara na sa pagtao nin kwarta sa mga ospital, natatabang ninda an mga pobreng constituentes sa pagtao nin healthcare kun haen man sinda asin dae na kaipuhan pa na magpasiring sa syudad kan Legazpi.
