LEGAZPI CITY-Piganunsyo kan Israel na magpapadagos an aid airdrops sa Gaza asin nagsasagibo na nin lakdang ngani mabawasan an humanitarian crisis sa Palestinian enclave, sa tahaw kan mga patanid kan nagkapirang mga relief agencies mapadapit sa lubod na pagkagutom sa nasambitang lugar.
Segun sa Israeli military na an magsasagibo an “humanitarian corridors” kan United Nations convoys nin safe movement para makapagtao nin asistensiya sa mga taga-Gaza asin ipapaotob man an “humanitarian pauses” sa mga lugar na kadakol an populasyon.
Katakod ini kan indirect ceasefire na pagoolay sa Doha sa pagultanan kan Israel asin kan mga Palestinian militant group na Hamas na dai naisakatuparan.
Isasagibo man an airdrops kairiba a pakikipagkoordinasyon sa international aid organizations na magtatao nin mga pagkakan siring kan arina, asukar, asin mga delata.
Pigkumpirma man kan mga Palestino na nagpoon na an pagpapaabot nin asistensiya sa northern Gaza.
